Samurtasunaren Bidaia

Samurtasun tailerrak barne iraultza handia izan dira niretzat. Bidaia benetan ederra, neure burua maitatzen eta onartzen lagundu didana; eta bizitzarekiko eta nirekin erlazionatzen diren pertsonekiko begirada eta jarrera askoz maitakor eta goxoagoa sortzen ere irakatsi didana. Neure buruari eman diodan oparirik onenetakoa.

Ia 14 urte pasa dira samurtasunera iritsi nintzenetik eta hemen jarraitzen dut. Iparrorratzak bizitzeko tresna bezala balio izan dit, nire barnean murgiltzeko eta nire burua askoz hobeto ezagutzeko. Samurtasunari esker lortu dut maitasunak nire bizitza gidatzea, maitasuna eman eta jaso, beldurrik gabe, zoriontsu, ni naizena gehiago izanik, zubiak sortuz, bizitza besarkatuz, horregatik betirako esker onekoa izango natzaie Olatz, Aingeru eta tailerretan, urte hauetan guztietan, bizitzaren gurpilean, neure burua begiratzeko ispilu izan zaizkidan pertsona guztiei. Eskerrik asko, eskerrik asko eta mila aldiz eskerrik asko.

Samurtasun tailerrak ezagutzea benetako iraultza izan da niretzat, nire bizitzan aurretik eta ondoren bat markatu duena. Bidaia honi esker, neure buruarekin harremanean jartzen eta neu naizenarekin elkartzen ikasi dut; nire gorputza eta nire sentipenak entzuten, bai ni nire buruarekin nagoenean, baita beste pertsonekin elkartzean ere. Nire gorputza maitatzen eta plazera errurik gabe bizitzen ikasi dut. Betiko eskertuta egongo naiz bide hau zeharkatzen bizitzeko zortea izan dudalako.

Duela urte batzuk hasi nuen samurtasunaren bideak erakutsi dit badudala iparrorratz bat, eta zuk ere baduzula iparrorratz bat. Barneko ahots bat, nire bizitzako edozein arlotan jarraitu beharreko bidea erakusten didana. Bestearekin egoten laguntzen didana, neure burua galdu gabe. Zintzotasunetik eta nire barne-izatearekin konektatuta egoten. Eta ez egin beharko nukeen horietatik. Eta hortik, soilik hortik, niretzat bestea den amildegira pixka bat hurbiltzeko gai izatea.
Samurtasunaren bidaiak erabat aldatu du nire bizitza eta munduan egoteko dudan modua.